Txiki eta Otaegi: bizitzagatik borrokan, heriotzagatik protestan

1975eko abuztuan, salbuespen-egoeraren errepresio-oihartzunak oraindik aienatu gabeak zirelarik, Estatuak beste kolpe bat iragarri zuen: gerra-kontseilu gehiago, heriotzazko zigor-eskaeradunak, zenbait euskal militante eta Estatuko iraultzaileren aurka. Burgosko prozesuan bezala, herritarren erantzuna irmoa eta jendetsua izan zen, manifestazio ugari eginez, baita greba orokor bat ere, baina, oraingoan, Erregimenak bere mehatxua bete egin zuen, azken muturreraino bete ere, irailaren 27an herio-kondenak gauzatu egin baitzituen, ETAko Jon Paredes Manot 'Txiki' eta Angel Otaegi eta FRAPeko beste hiru militante, Humberto Baena, Sanchez Bravo eta Garcia Sanz fusilatuz. Huraxe izan zen Francoren agur odoltsua. Euskal Herritik kanpo ugariak izan ziren protestak, espainiar enbaxaden aurkako hainbat eraso ere barne. Frankismoak sekula izandako ausiabartza diplomatikorik handiena izan zen.

Jon Paredes Manot, Txiki, Badajozeko Zalamea de la Serena herrian jaioa, hainbeste maite zuen Che Guevararen kamiseta jantzita (ezk.) eta mendian eskalatzen (esk.) Argazkiak: Paredes Manot sendiaren funtsa.

2010. urtean, Txikiren abokatuek bere sendiari eman zizkioten gaztea hiltzeko erabilitako balen zorroak. Sendiak Lazkaoko Beneditarren Artxiboan gordetzea erabaki zuen. Goian, fusilamenduen aurkako manifestazioa Baionan. Argazkia: Daniel Velez.

Txiki fusilamendu-pelotoiaren aurrean jarri zutenean, “Aberria ala hil! Gora Euskadi Askatuta! Gora Euskadi sozialista!” oihukatu zuen eta Eusko Gudariak kantatzen jarri zen. Balek hil zuten kantaren bigarren ahapaldiari ekin zionean. Argazkia: Marc Palmes.