Itoitz porlanezko gezurra

Francoren garaiko proiektua da Itoizko urtegia. Inguruko herritarrak beti aurka izan dituen urtegia. 1993. urtean hasi ziren horma erraldoia eraikitzeko lanak, baina Nafarroako Gobernuak bidalitako makinek herriak eraitsi zituztenean bizi izan ziren Itoitzen unerik beltzenak. Itoitz, Artozki, Orbaitz… betiko desagerrarazi zituzten. Ekintza burutuen politika erabiliz. Liburu honek etxe horietako jabeen hitzak bildu ditu; zuhaitzetara igo eta etxeetara kateatu ziren solidarioenak; Itoizko Koordinakundeak epaitegietan egindako bideari so egin dio. Ia hogei urteko borrokak eman eta kendu duena ekarri nahi izan du gogora, herri baten erresistentziarako grina agerian utziz.