Egunak

Euskal presoen duintasunak literaturaz gozatzeko eta errepresaliatuen egoeraren berri zuzenean izateko aukera eman digu behin baino gehiagotan. Isolamenduaren gogorrenetik ihes egiteko idazten du presoak. Askatasunik ez dagoen lekuan askatasuna idatzi egiten du, eta hitzekin batera ihesari lotzen zaio. Kalera igortzen duen gutun eta liburu bakoitza, askatasun zati bat da. Hormen artetik ihes egitea lortu duen taupada bat. Eta taupada hauek entzunda edo irakurrita bakarrik uler daiteke kartzelaren logika absurdua. Zigorra 10.950 egunekoa da. Zu liburua irakurtzen nekatu bazara, irudika ezazu egunez egun hau guztia bizi behar duen edozein euskal preso politiko dio egileak epilogoan. Eta arrazoi du. Irakurlea gatibatzen du liburu honek, baina idazlea da preso jarraitzen duena.