Atzoko eta gaurko harresiak

Utopiez mintzo da liburu hau: mundua aldatu nahi zuten komunisten utopiaz; hauen buruzagiek sortutako utopia errealaz; stalinisten iruzurra eta hilketak borrokatu zituztenen utopiaz; eta, estatuek baztertutako nazio eta hizkuntza gutxituen utopiaz. Horiek guztiak, eta bat gehiago azaltzen da. Idazleak bere nortasunaren inguruko zalantzak argitzeko duen nahia. Horregatik, utopia horien bila joaten da. Berlingo harresia erori, eta hamar urte beranduago burututako bidaia da honakoa. Baina ez da bidaia fisikoa bakarrik, izan ere, honen kontakizuna aitzakia bihurtzen da Europa Ekialdeko zenbait atal historiko gogora ekartzeko, eta alde honetako herri eta hizkuntzak ezagutzeko. Tartean, egungo egoera soziala eta politikoa ditu hizpide. Bereziki, Demokrazia berriak sortu duen etsipena eta frustrazioa tratatzen ditu bertakoen ahotik.