Gazte gara gazte... eta ez gaude konforme! • Floren Aoiz

Antolakuntza egitasmoei dagokienez, alta, 40 urte betetzea eta gaztetasuna erabat bateragarriak izan daitezke. Duela 40 urte gazte antolakunde abertzale eta ezkerrekoa sortu zen eta geroztik, hainbat unetan egoerak (eta zehazki errepresioak) hausturak ekarri baditu ere, gazte taupada horren hotsa aditu da Euskal Herrian. Forma ezberdinak hartu ditu, eta ez gara, beraz, erakunde bakarraz ari, baina, zorionez, gazteria errebeldearen indarra ez da inoiz itzali ordudanik.

Liburu honek taupada horren ibilbidearen historia kontatzen du. 40 urte asko dira eta ahalegin handiak egin behar izan dituzte testua laburtzeko, kontu asko aipatu gabe gelditu direlarik. Kontakizun orokorra da, eta hor ez dira kabitzen hamaika bizipen pertsonal, baina liburuaren helburua ez da oroimen saioa agortzea, marko orokorra eskaintzea baizik, "Bulkada berrien garaia da" ekimenaren testuinguruan, oroimena bizirik gordetzeko ekimen ederrak ari baitira egiten herriz herri, transmisio ariketa osatzeko.

Gauza asko gertatu dira 40 urteotan, besteak beste ezker abertzalearen estrategiaren egokipena eta borroka ziklo berri baten irekiera. Bidaian, eztabaidak, borrokak, harremanak, bilerak, manifestazioak, gaztetxeak, ikasle ekimenak, autoritarismoa eta erasoen kontrako kanpainak, gazte problematika eta gatazka orokorraren arteko artikulazioak, drogen inguruko ez- tabaida eta jarduerak, soldaduskaren errefusatik intsumisiorako trantsizioa, feminismoaren indartzea, jaialdiak... eta, tamalez, errepresioa, beti errepresioa. Errepresioak baldintzatu du gazte antolakundeen ibilbidea 40 urte hauetan, baina ez du inoiz bere helburu nagusia lortu, gazte matxinada ez baita sekula ere gelditu.

Mutazio handiak ezagutu dituzte gazte mugimenduak nahiz ezker abertzalean kokatutako gazte antolakundeek, eta liburuak ongi islatzen ditu. Une gozoak eta tenore ilunak. Tortura, exilioa, kartzela, ezintasuna, egoneza, zapuzketa, beldurra, amorrua, baina, halaber, ilusioa, bizipoza, itxaropena, elkarlanerako prestutasuna, beste mundu bat eraikitzeko gogoa, tinkotasuna, maitasuna... Ibilbide luze honetan denak korapilatzen dira, ondare erraldoia osatuz. Ondare erraldoia bidaia honek eskaintzen duena; alde batetik, jakina, gaur egungo gazteriari eskaintzen zaion esperientzia, baina, era berean, baita beteranoendako ere.

Floren Aoiz