Beltzaren aroa

Aezkoako mendi sute batean hiru mendizale hil eta geroko ikerketan, poliziak bi artzain atxilotu eta espetxeratu ditu. Urtebete geroago, Konpainia izeneko aseguru etxeak Ainhoa Sanz peritua bidaliko du Aezkoara sutea ikertzera, aseguru etxearen bezero diren artzainen inplikazioa argitzeko; Konpainiak diru asko baitu jokoan bezeroak errudun joz gero. Horrela, Nabala herritik abiatuta, Ainhoak ezagutzen ez duen ingurune bat arakatu beharko du egia argitu nahian, aseguru etxeak jarri dion Joxe gidariaren laguntzaz. Bilaketa horretan, meatzaritza enpresen interesak, artzainen arteko ezinikusiak, Guardia Zibilaren presentzia itogarria, gaueko langileak eta beste hainbat elementu topatuko ditu.

Beltza da gaua Euskal Herriko oihanean. Su txingarrek emango ote diote Ainhoari bidea aurkitzeko nahikoa argi?

Baztango Udalak, (H)ilbeltza ekimenak eta Txalaparta argitaletxeak elkarlanean antolatzen duten V. (H)ilbeltza bekaren emaitza da eleberri beltz hau.

Ipuinak, poesia, elkarrizketak eta nobela jorratu ostean, Eneko Barberena arrasatearra genero beltzaren neurriko eleberria josi du puntadarik hutsik egin gabe.

Egilea

Eneko Barberena Mondragon. 1983, Arrasate (Gipuzkoa, Euskal Herria). Erdi giputz erdi aetz, gaur egun Aretxabaletan bizi da. Literaturaren arloan ipuinak, poesia, elkarrizketak eta nobela jorratu ditu. Augustin Zubikarai beka irabazi zuen Ondarroan 2018an, eta (H)ilbeltza beka Baztanen 2021ean. Hainbat hedabidetan ere kolaboratu du; hala nola, Goiena, Puntua, Hala Bedi, Info 7, Gara, Txapa Irratia, Hitzen Uberan, Gaztesarea eta Xirika medioetan. Egun Sagasti Etxea izeneko literatura bloga du martxan Goiena.eus atarian.