Udaberri kantoi-hautsia

Uruguaiko autorerik emankor eta irakurrienetako bat da. Genero anitz landu zituen (poesia, eleberria, antzerkia, ipuinak, saiakera…), eta 80tik gora liburu argitaratu. Uruguaiko 1973ko estatu-kolpe militarraren ondorioz, erbestean eman behar izan zituen hamabi urte, Argentinan, Perun, Kuban eta batez ere Espainian. Benedettiren liburuek gizakiaren kezkak eta eguneroko bizimodua dituzte ardatz, eta leku nabarmena eskaintzen diete gai sozial eta politikoei. 1973 ondoren idatzitakoetan behin eta berriro agertzen dira errepresioa, kartzela, erbestea, tortura eta Uruguaiko eta Latinoamerikako errealitatearekin loturiko beste hainbat gai.

Gasteizko Letren Fakultatean Itzulpengintza eta Interpretazioko lizentzia ikasi zuen lehen promozio hartako ikasleetako bat izan zen Jaka 2000 eta 2004. urteen artean. Geroztik, itzulpenari loturiko bestelako lanbideetan ere aritu izan den arren (euskara eta gaztelania irakasle Ingalaterran, Elhuyar fundazioan hiztegigile, Eskura Itzulpen Zerbitzuetan itzultzaile, basqueliterature.com eta EIZIEren webguneetan webmaster eta itzultzaile…), unibertsitate-munduari lotuta jarraitu du beti. 2011n Joseba Sarrionandiaren itzulpengintzari buruzko doktore-tesia bukatu zuenetik, Euskal Herriko Unibertsitatean dihardu lanean, itzulpengintza arloko ikasgaiak irakasten. Literatur itzulpenean ere aritua da, bereziki haur eta gazte literaturako liburuak itzultzen. 2011n Haur Literaturako Vitoria-Gasteiz saria jaso zuen Janosch alemanaren Esan, ama, nork egiten ditu umeak? liburuaren itzulpenagatik, eta 2013an, berriz, Jokin Zaitegi beka irabazi zuen Maialen Marin itzultzailearekin batera Mo Yan idazle txinatarraren Hori da umorea, maisu! obra euskaratzeko.