Zenbat lo

Txikitandik ibili da sormenaren zirrikituak arakatzen. Bide horretatik gauzatu zituen ikasketa formalak, Arte Ederrak eta Artearen historia lizentziak lehenik eta Diseinuko goi ikasketak gero; ordutik, bere kabuz marrazten jarraitu du eta sorkuntzaren unibertsoan kokatu du bizi-esperientziaren haria. Ogibidez, beti aritu da sormenari loturiko jardunetan. Azken urteetan, ipuinen eta album ilustratuen munduak liluratuta, haur literaturarako ilustrazioak sortzearen bide honi ekin dio.  Bere lanaren bidez, pertsonengana iristea gustatzen zaio; maite du arteak duen berezko hizkuntza eta horrek emozioak eragiteko duen gaitasuna. Bizitza besarkatzeko eta bertan egoteko hautu bat da, mundua eraldatzeko bere kasketa txikia.

Antzerki ikasketetan doktoretza egina du, eta gorputz adierazpena, antzerkigintza eta zirku akrobaziei lotuta egin du bere ibilbidea. Aktore lanetan aritu da hainbat konpainiatan, esate batera, Pikor, Txalo, Artedrama eta Trapu Zaharra taldetan, baita Gure Zirkuan ere aireko akrobata gisara. Zuzendari eta gidoilari lanetan ere aritu da, esate baterako Lankuk ekoitzitako “Teilatupean” obran. Sormenak bultzatzen du, eta orain artean gorputzetik aritu bada ere, azken boladan idazteari ekin dio, adierazteko bide berriak arakatzeko gogoz. Gorputzetik idazten du, mugimendutik, emoziotik... Irakurlea astindu eta zirikatu zalea da, eta uste sendoa du sormenaren katea sortzaileaz haratago doala.